Kwa mujibu wa Idara ya tarjama ya Shirika la Habari la Hawza, Papa Leo, akisisitiza umuhimu wa kusitishwa mapigano, alisema: “Natoa wito wa dhati kabisa wa kumalizika uhasama, ili wananchi wa Yemen na watu wote wa mataifa ya eneo hili waweze kuishi kwa amani.”
Papa Leo XIV alielezea wasiwasi wake wa pekee kuhusu hali ya kibinadamu katika mji wa Taiz, ulioko kusini-magharibi mwa Yemen, huku akibainisha kuwa wakazi wake wanakabiliwa na uhaba wa chakula, maji na huduma za matibabu.
Kwa mujibu wa taarifa zilizoripotiwa, kuongezeka mapigano na uhaba unaozidi kuongezeka wa mafuta katika mji wa Taiz kunatishia mifumo ya usambazaji wa maji inayoungwa mkono na Shirika la Umoja wa Mataifa la Kuhudumia Watoto (UNICEF). Mifumo hiyo inatoa huduma kwa takribani wananchi milioni tatu wa Yemen, wakiwemo watoto karibu milioni 1.6.
Katika sehemu nyingine ya hotuba yake, Papa alibainisha kuwa vita, mbali na kusababisha kuongezeka vifo na uharibifu, vinaifanya dunia kuwa maskini na kuiacha ikiwa imejeruhiwa.
Aliongeza: “Haijawahi kuwa wazi kama ilivyo leo kwamba vita, mbali na kusababisha vifo na uharibifu, vinaifanya dunia kuwa maskini na kuiacha ikiwa imeathirika.”
Aidha, Papa aliwaombea wahanga wa shambulio la kigaidi lililolenga Kanisa la Kiorthodoksi la Mtakatifu George nchini Jordan, na kueleza hisia zake za pole na mshikamano kwa familia za wahanga pamoja na watu waliojeruhiwa.
Chanzo: Ava Press.
Maoni yako